Беморхонаи марказии ноҳияи Восеъ, ки аз се ошёна иборат аст, баъди таъмиру навсозӣ ба истифода дода шуд.

Бино ба иттилои сардухтури беморхона Диловар Валиев, бо мақсади беҳтар намудани сифати хизматрасонии тиббӣ ду мошини ёрии таъҷилӣ 24 соат дар хизмати сокинони ноҳия қарор доранд.

Айни замон дар беморхона беҳтарин мутахассисони соҳаи тиб кору фаъолият мекунанд, ки беш аз 70 фоизи онҳоро табибони ҷавон ташкил медиҳанд. Дар тобеъияти беморхонаи ноҳия панҷ беморхонаи рақамӣ низ фаъолият дорад. Шумораи табибони маълумоти олидор 90 нафарро ташкил медиҳад.

Исломи РАҶАБАЛӢ,

«Садои мардум»  

Бахшида ба Ҷашни 35-солагии Истиқлоли давлатии Ҷумҳурии Тоҷикистон дар деҳаи Тутои ноҳияи Муъминобод бинои нави муассисаи таҳсилоти миёнаи умумии №7 ва дар деҳаи Навбаҳори ноҳия иншооти муассисаи таҳсилоти миёнаи умумии №37 бо шароити замони муосир сохта ба истифода дода шуданд.

Зимни ифтитоҳи иншооти мазкур Сарвазири Ҷумҳурии Тоҷикистон Қоҳир Расулзода, раиси вилояти Хатлон Давлаталӣ Саид, вазири маориф ва илм Раҳим Саидзода ва раиси ноҳия Сайвалӣ Амирзода иштирок намуда, иттилоъ дода шуд, ки ҳар ду муассиса бо маблағи 11 миллиону 657 ҳазору 592 сомонӣ сохта шуданд.

 Муассисаи №7 аз ду ошёна иборат буда, дар як баст барои 240 хонанда пешбинӣ шудааст, ки дорои синфхонаҳои технологияи информатсионӣ, физика, химия, биология, математика, забони русӣ ҳуҷраи омӯзгорон ва синфхонаи инкишофи барвақтии кӯдакон мебошад.

Муассисаи №37 бошад, барои 480 хонанда пешбинӣ шуда, дорои 10 синфхонаи бо  шароити муосир муҷаҳҳаз аст.

Сарвазири мамлакат ҳангоми боздид аз иншооти навбунёд, зикр доштанд, ки соҳаи маориф зери таваҷҷуҳи ҳамешагии Ҳукумати кишвар ва Роҳбари олии мамлакат қарор дошта, таъмини шароити муосир барои таълиму тарбияи насли наврас омили муҳим дар рушди ҷомеа ба ҳисоб меравад.

И. РАҶАБАЛӢ,

«Садои мардум»

Бо мақсади боз ҳам баланд бардоштани мақоми зан дар ҷомеа масъалаи ба таҳсил фаро гирифтани духтарон ҳамеша мавриди таваҷҷуҳи хоса қарор дорад. Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 28 сол қабл, 26 апрели соли 1997, дар Анҷумани сеюми иттиҳодияҳои занон, созмонҳои ғайриҳукуматии занони ҷумҳурӣ зарурати таъсиси Квотаи Президенти Ҷумҳурии Тоҷикистонро таъкид карданд. Тибқи Квотаи президентӣ ҳамасола садҳо нафар духтарон аз ноҳияҳои дурдасти кишвар ба муассисаҳои таҳсилоти олии касбӣ ва миёнаи махсус дохил шуда, соҳибмаълумот мегарданд.

Онҳо давоми таҳсил аз имтиёз­ҳои зиёд, аз ҷумла таъмин бо хобгоҳ ва идрорпулӣ, бархӯрдоранд. Маҳз бо шарофати ин иқдоми Пешвои миллат занону духтарон баробари мардон дар вазифаҳои роҳбарикунанда фаъолият доранд.

Сарвари давлат дар Паём ба Маҷлиси Олии кишвар 28 декабри соли 2024 изҳор доштанд: «Имрӯз 42 ҳазору 400 нафар ҷавонони мо дар 42 давлати мутараққии ҷаҳон таҳсили илм доранд, ки 13 ҳазор нафар ё беш аз 30 фоизи онҳо духтарон мебошанд».

Далели дигари таваҷҷуҳи хосаи Президенти мамлакат муҳтарам Эмомалӣ Раҳмон нисбат ба занону модарон таъсиси гранти президентӣ мебошад. Илова бар ин, бо ташаббуси Пешвои миллат солҳои 2022 — 2026 «Солҳои рушди саноат» эълон гардид, ки барои таъсиси ҷойҳои нави корӣ барои занони соҳибкору ҳунарманд замима фароҳам овард. Гузашта аз ин, сол аз сол бо дастгирии Пешвои миллат муҳтарам Эмомалӣ Раҳмон шумораи занони соҳибкор дар ҷумҳурӣ зиёд мешаванд. Метавон гуфт, ки занону духтарони ҳунарманд бо ташкили марказҳои ҳунармандӣ, коргоҳу корхонаҳои дӯзандагӣ, чорвопарварӣ дар амалӣ гардидани ҳадафҳои созандаю бунёдкоронаи Ҳукумати мамлакат саҳми арзанда мегузоранд.

 Тозагул Ватанова соҳиби гранти президентӣ аз ноҳияи Восеъ буда, 25 сол мешавад, ки ба дӯхтани лавозимоти гаҳвора (рӯйпӯш, болишт ва дастбанд) машғул аст. Ин зани солманд аз дастгириҳои Пешвои миллат муҳтарам ­Эмомалӣ Раҳмон хеле шод аст. Соли гузашта лоиҳаи пешниҳоднамудааш дастгирӣ ёфта, соҳиби 40 ҳазор сомонӣ гардид. Маҳсули ҳунари номбурда дар озмуну фестивалҳои ноҳиявӣ, вилоятӣ ва ҷумҳуриявӣ ба маъраз гузошта шуда, борҳо сазовори ҷойҳои намоён ва соҳиби диплому ифтихорномаҳо гардидааст.

Барои тавсеаи ин раванд дар қиёс ба солҳои пешин маблағи грантҳои раиси вилояти Хатлон низ ду баробар зиёд шуд. Соли 2024 дар доираи Форуми байналмилалии сармоягузорӣ — содиротии «Хатлон — Инвест» 30 соҳибкорзани вилоят 500 ҳазор сомонӣ гранти раиси вилояти Хатлонро гирифтанд. Аз ҷумла, Зебогул Назарова, сокини деҳаи Сурхдараи ноҳияи Восеъ, яке аз гирандагони гранти раиси вилояти Хатлон дар соли 2024 мебошад. Номбурда лоиҳаи худро дар самти ҳунарҳои мардумӣ (дарздӯзӣ, чакандӯзӣ, порадӯзӣ) пешниҳод намуда, соҳиби 15 ҳазор сомонӣ гардид.

«Ҳунари порадӯзиро аз модарам ёд гирифтам ва 33 сол мешавад, ки аз рӯи ин касби пешакарда зиндагиро пеш мебарам ва даҳҳо зани хонашинро соҳибкасб намудам. Аз ҷумла, соли 2024 ба15 зани деҳа дар хонаи истиқоматии худ дарздӯзиву чакандӯзиро омӯзонидам ва онҳо аз ҳисоби шуъбаи Агентии меҳнат ва шуғли аҳолӣ дар ноҳияи Восеъ соҳиби сертификат гардиданд. Соли 2025-ум 40 зани дигари деҳаро, ки бештарашон хонашин мебошанд, ҳамчун шогирд қабул намуда, ҳунарамро меомӯзонам», — мегӯяд номбурда.

Зебогул ифтихор аз он дорад, ки дар даврони соҳибистиқлолии мамлакат бо дастгирии Пешвои миллат муҳтарам Эмомалӣ Раҳмон ҳунарҳои мардумӣ дубора эҳё гардиданд. Ин ҳунарманд мақсад дорад, ки барои рушди ҳунарҳои мардумӣ коргоҳи хурд таъсис диҳад.

 Сокини дигари ноҳияи Восеъ Соҷида Ҳусайнова низ яке аз гирандагони гранти раиси вилояти Хатлон дар соли 2024 мебошад. Ӯ лоиҳаи худро дар самти ҳунармандӣ (дӯзандагӣ) пешниҳод намуда, соҳиби 15 ҳазор сомонӣ гардид.

 Дар маҷмуъ, соли 2024 аз ­ноҳияи Восеъ як зан соҳиби гранти президентӣ ва се бону соҳиби гранти раиси вилояти Хатлон гардиданд. Айни замон дар ноҳияи Восеъ 311 зан ба соҳибкорӣ, ҳунармандӣ машғул буда, дар рушди иқтисодиёти мамлакат нақши арзанда мегузоранд.

Бибинисо Гулмуродзода,

муовини раиси ноҳияи Восеъ

Сардори нозироти андози ноҳия Бегиҷон Баротзода иттилоъ дод, ки ба ҷойи 7 миллиону 065 ҳазору 600 сомонӣ ба буҷети давлатӣ 7 миллиону 795 ҳазору 209 сомонӣ ворид шуд, ки нисбати нақша 729 ҳазор сомонӣ зиёд мебошад.

Алҳол дар ноҳияи Темурмалик 333 шахси ҳуқуқӣ, 107 соҳибкори инфиродӣ тибқи шаҳодатнома, 84 соҳибкор тибқи патент, 316 соҳибкор тибқи шаҳодатнома бо шартҳои махсус ва 1042 хоҷагии деҳқонӣ ҳамчун андозсупоранда фаъолият доранд.

Ҷиҳати кам кардани бақияпулиҳои қарзи андоз аз тарафи кормандони нозироти андоз тадбирҳои зарурӣ андешида шуда, дар се моҳ беш аз 207 ҳазор сомонӣ қарзи андоз кам гардидааст.

И. РАҶАБАЛӢ,

 «Садои мардум»

Соли равон дар ноҳия дар майдони 9335 гектар кишти пахта ба нақша гирифта шудааст.

Дар ин маъракаи муҳим раиси вилояти Хатлон Давлаталӣ Саид иштирок намуда, ба кишоварзон оид ба истифодаи самараноку оқилонаи замин, риояи қоидаҳои агротехникӣ, аз ҷумла коркарди саривақтии байни қаторҳо ва таъмин намудан бо нуриҳои минералӣ дастуру маслиҳатҳои судманд дод.

Тибқи иттилои Сарраёсати кишоварзии вилояти Хатлон, соли равон дар шаҳру ноҳияҳои пахтакори вилоят дар майдони 120 ҳазору 500 гектар кишти пахта ба нақша гирифта шудааст.

 С. СУЛТОНОВ,

«Садои мардум»

Дар расми ифтитоҳи он раиси ноҳияи Шамсиддин Шоҳин Зафар Гулзода, бо сокинони деҳа мулоқот намуда, аз дастгириҳои пайвастаи Ҳукумати мамлакат, хоса Пешвои миллат муҳтарам Эмомалӣ Раҳмон, барои дастгирӣ ва ғамхориҳояшон нисбати мактабу маориф изҳори миннатдорӣ намуданд.

Изҳор гардид, ки сохтмони иншоот моҳи апрели соли 2024 оғоз гардида, он аз ду ошёна  иборат мебошад.

Пудратчии сохтмон Ҷамъияти дорои масъулияташ маҳдуди «Сохтмони аср» буда, тамоми корҳои сохтмонӣ дар сатҳи хубу сифати баланд амалӣ шуданд.

И. РАҶАБАЛӢ,

«Садои мардум»

Соли равон дар вилояти Хатлон тиб

Ба иттилои сардори Сарраёсати кишоварзии вилоят Баҳром Ҳасанзода, нақшаи кишти пахта назар ба соли 2024 ба андозаи 24 ҳазор гектар зиёд буда, хоҷагидорон азм доранд, 298 ҳазору 100 тонна «тиллои сафед» ҷамъоварӣ намоянд.

- То 7-уми апрел аллакай дар майдони 38 ҳазор гектар кишт шудааст, ки 7 ҳазор гектари он зери плёнка мебошад. Маъракаи кишти пахта дар шаҳру ноҳияҳои пахтакори вилоят бо маром идома дошта, хоҷагидорон дар ҳамкорӣ бо олимону мутахассисони соҳа аз навъҳои серҳосили тухмӣ истифода бурда истодаанд, — гуфт дар идома Б. Ҳасанзода.

Тибқи иттилои масъулин ба ҳар як гектар пахтазори вилояти Хатлон 24 сентнерӣ нақшабандӣ шуда, кишоварзон азм доранд нақшаи истеҳсоли ин ашёи хоми саноатиро барзиёд таъмин намоянд.

С. СУЛТОНОВ,

«Садои мардум»

Таҷриба собит намудааст, ки давлату миллат бе қувваҳои мусаллаҳи пурқудрат вуҷуд дош­та наметавонад. Чунки қувваҳои мусаллаҳ, пеш аз ҳама, таъминкунандаи амнияти кишвар буда, оромию осудагии мардум ва осоиштагию шукуфоии давлатро таъмин менамояд.

Ҷумҳурии Тоҷикистон дар баробари дигар давлатҳои ҷаҳон соҳиби Артиши миллии худ буда, заминаи моддию техникии он ба шарофати соҳиб­истиқлолии мамлакат ва Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон мустаҳкам гардид.

Борҳо дар рӯзи даъватшаванда шоҳиди ҳол гаштаам, ки ҷавонони зиёд бо хоҳиши худ ба сафи Қувваҳои Мусаллаҳи кишвар пайвастанд. Ҳатто яке аз модарони хушбахту ватандӯстро аз шаҳри Кӯлоб дидам, ки дар рӯзи аввали даъвати тирамоҳӣ фарзандашро, ки аз Федератсияи Россия баргашта буд, бо хоҳиши худ ба хизмати ҳарбӣ гусел намуд.

Дар солҳои мудҳиши ҷанги шаҳрвандӣ новобаста аз вазъи душвору ҳассос барои таъсиси Артиши миллӣ марди ҷасуру тавонои миллат муҳтарам Эмомалӣ Раҳмон аз тамоми имконоту шароит истифода бурда, барои мустаҳкам намудани қобилияти мудофиавии кишвар, беҳдошти шароити хизмативу маишӣ ва хубтару беҳтар намудани вазъи иҷтимоии хизматчиёни ҳарбӣ тадбирҳои саривақтӣ андешиданд. Дар тӯли ин солҳо бо дастгирӣ ва иқдомҳои наҷиби Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон Артиши ҷавони Тоҷикистон соҳиби шароити муосир гардида, дар роҳи пурзӯр ва мустаҳкам гардидани иқтидори мудофиавии мамлакат гомҳои устувор гузошта шуд.

Пешвои миллат муҳтарам Эмомалӣ Раҳмон ба фарзандони содиқу шуҷои Ватан, ки аз рӯзҳои аввали соҳибистиқлолии мамлакат дар бунёди Артиши миллӣ саҳм гузоштаву то ҳол ба давлату миллат софдилона хизмат намуда истодаанд, изҳори сипос намуда, таъкид намуданд, ки давлату Ҳукумат ва мардуми шарифи Тоҷикистон фидокориву ҷоннисориҳои афсарону сарбозони шуҷои Ватанро ҳаргиз фаромӯш нахоҳад кард.

Дар даврони соҳибистиқлолии мамлакат бо дастгирии Ҳукумати Ҷумҳурии Тоҷикистон дар самти бунёд­корӣ ва созандагиҳо барои пешбурди фаъолияти низомиён бинову иншооти ҳарбӣ, бо шароити муосир мавриди баҳрабардорӣ қарор гирифтанд. Аз ҷумла, бо дастуру супоришҳои Роҳбари мамлакат дар тамоми гарнизонҳои ҷумҳурӣ қисмҳои низомӣ бо тамоми шароити муосир сохта ба истифода дода шуданд.

Ҳамчунин, дар замони Истиқлолияти давлатӣ биноҳои комиссариатҳои ҳарбӣ дар шаҳру навоҳии ҷумҳурӣ бо сифати баланд бунёд гардиданд.

Масъалаи дигаре, ки мавриди таваҷҷуҳи ҳамешагии Пешвои миллат муҳтарам Эмомалӣ Раҳмон қарор дошт, таъмини хизматчиёни ҳарбӣ ва аҳли оилаи онҳо бо манзили истиқоматӣ мебошад. Ҳоло дар тамоми шаҳру ноҳияҳои ҷумҳурӣ хизматчиёни ҳарбӣ бо манзили зист таъмин буда, бунёди хонаҳои истиқоматӣ барои афсарону оилаҳои онҳо идома доранд.

Баъд аз андешидани тадбирҳои пайваста Артиши миллӣ марҳила ба марҳила устувору қавитар гардида, бо техникаву таҷҳизоти муосир таъмин шуд ва ба неруи пурқудрати дорои ҷузъу томҳои замонавӣ табдил ёфт. Ҳоло Артиши миллии Тоҷикистон ҳамчун неруи обутобёфта, ҷангдида бо шуҷоату ватандӯстӣ яке аз рукни муҳими давлатдории миллӣ дониста мешавад. Маҳз бо шарофати кӯшишу заҳматҳои Сарфармондеҳи Олии Қувваҳои Мусаллаҳи кишвар муҳтарам Эмомалӣ Раҳмон Артиши миллии Тоҷикис­тон пурқувват гардид.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёмашон ба Маҷлиси Олии Ҷумҳурии Тоҷикистон таъкид намуданд, ки воқеоту таҳаввулоти ҷомеаи ҷаҳонӣ ҳар яки моро ҳушдор месозад, ки зиракии сиёсӣ, омодагии доимӣ, эҳсоси баланди ватандӯстӣ, худогоҳӣ ва муқаддас доштану ҳифз намудани арзишҳои истиқлолияти давлати соҳибистиқлоламонро аз даст надиҳем. Чунки вазъи зудтағйирёбандаи ҷаҳони муосир, зиёд гардидани равияву созмонҳои террористиву экстремистӣ ва дигар зуҳуроти таҳдидовари хатарнок метавонад сулҳу субот ва ҳаёти орому осудаи мардуми кишвари моро халалдор намояд. Аз ин рӯ, ҳар як афсар ва сарбози шуҷои кишвар ҳамчун сипари боэътимоди Ватан дар иҷрои вазифаҳои хизматиашон бояд ҳамеша ҳушёру зирак бошанд ва ҳаргиз фаромӯш накунанд, ки фазои орому осудаи имрӯзаи Тоҷикистони соҳибистиқлол ба ивази ҷони садҳо нафар ҷавонмардони бонангу номуси миллат ба даст омадааст. Илова бар ин, ҳамеша дар хотир дошта бошанд, ки мардуми Тоҷикистон бо хизматчиёни ҳарбии Қувваҳои Мусаллаҳи худ ифтихор намуда, дар симои ҳар яки онҳо фарзандони далеру шуҷои Ватани азизамонро мебинанд ва бовар доранд, ки онҳо ба савганди ҳарбии худ ҳамеша содиқ мемонанд.

Исломи РАҶАБАЛӢ,

«Садои мардум»

Дар доираи омодаги

Тавре зимни суҳбат мудири бахши сохтмон ва меъмории ноҳия Саид Шукуров иброз дошт, иншооти мазкур аз ҷониби соҳибкори маҳаллӣ Сино Раҷабов бо харҷи 5 миллиону 580 ҳазор сомонӣ бунёд гардида, дар он 12 нафар сокини шаҳрак бо ҷои кор таъмин шуданд.

Дар иншооти мазкур корҳои сохтмонӣ аввали соли 2024 оғоз гардида, бо санъати баланди меъморӣ бунёд шуд.

Ошёнаи аввали бино аз марказҳои савдою хизматрасонӣ иборат буда, сокинон метавонанд молҳои ниёзи хешро аз он ҷо дастрас намоянд. Ошёнаҳои дигар бошад, барои хонаҳои истиқоматӣ пешбинӣ шуда, дар маҷмуъ, 48 хонаи 1, 2 ва 3- ҳуҷрагиро ташкил медиҳад.

Ҳамзамон, С. Шукуров иттилоъ дод, ки дар доираи Ҷашни 35-солагии Истиқлоли давлатӣ дар ноҳияи Ҷалолиддини Балхӣ бунёди 18 бинои баландошёна ба нақша гирифта шуда, то инҷониб 6 адади он пуррра сохта ба истифода дода шудааст.

С. СУЛТОНОВ,

“Садои мардум”   

Дар доираи омодагиҳо ба Ҷашни 35-солагии Истиқлоли давлатии Ҷумҳурии Тоҷикистон дар деҳаи Сангпари деҳоти Зиракии шаҳри Кӯлоб корхонаи хурди ҳасиббарорӣ сохта мавриди истифода қарор дода шуд, ки дар расми ифтитоҳи он раиси вилояти Хатлон Давлаталӣ Саид ва раиси шаҳри Кӯлоб Бахтиёр Назарзода иштирок намуданд.

Зимни ифтитоҳи корхона изҳор гардид, ки дар татбиқи ҳадафи чоруми стратегӣ — саноатикунонии босуръати кишвар саҳми соҳибкорони ватанӣ назаррас буда, бо ин васила метавонанд, ки сокинони маҳаллиро бо ҷойи кор ва маоши хуб таъмин намоянд.

Корхонаи ҳасиббарорӣ аз ҷониби соҳибкори маҳаллӣ Валиҷон Абдураҳимов таъсис дода шудааст. Гуфта шуд, ки иқтидори истеҳсолии корхона дар як шабонарӯз 1000 кг буда, дар он 10 навъи ҳасиб истеҳсол мегардад.

Айни замон дар корхона 16 нафар сокинони маҳаллӣ бо ҷойи кор ва маоши хуб таъмин шудаанд.

И. РАҶАБАЛӢ,

«Садои мардум»